My 4th Pune Tour

Ek baar firse Pune ki sadkon se hoke guzarna, Ek baar firse Pune ke Railway Station me train ka intezaar karna, Ek baar firse Pune ke hotel me theherna… Ek baar firse Pune ki hawaon ko mehsoos karna… Ek baar firse Pune ke Dagdu Sheth Ganpati mandir ke Darshan lena… Ek baar firse Pune me koi movie dekhna…Aur ek baar firse Pune se kuchh yaaden wapas ghar leke aana….Inhi baaton ke sath maine apna 4th Pune tour khatam kiya…. Isse pehle mai 3 baar ja chuka tha Pune… Par last 3 baar aur is baar me farkk sirf do baaton ka tha…. Ek ki is baar maine Pune jake ek interview diya…Aur Doosra ki is baar mere sath Pune me koi bhi nahin tha…. Is baar maine akele hi sab kuchh experience kiya…Kai baar akele-pan me aap dunia ko jyda kareeb se mehsoos kar paate ho… aap wo sab soch paate ho… observe kar paate ho jo normally kisi ke sath rehne se aap nahin kar paate kyunki jab koi sath rehta hai to aapka jyda se jyda dhyan aapke sath wale pe hota hai, dunia pe nahin….

31st January 2018, Naye saal ke pehle mahine ka akhiri din…Sham ka waqt tha aur mujhe ‘Thackrey’ movie dekhna tha…. Mujhe kisi bhi famous personality ke upar bane hue movie dekhna bahot achha lagta hai…. aur Iske liye main apne hotel se nikla…. Bich me ek signal pada…Signal me ek baat maine observe kiya… Normally signal me jab koi gaadi rukta hai bade cities me to Paise mangne wale aksar humare gaadi ke pass aa khade hote hain… Par wahan signal pe ek lady Pen bech rahi thi…. Us pen ki keemat 5 rs hai kyunki wahi pen mai normally leta hoon….. Wo lady us pen ko 10 Rs me sell kar rahi thi aur usse koi bhi pen nahin le raha tha…. Mera auto pichhe khada tha signal me isliye mai pichhe se sab kuchh dekh raha tha ki saamne kya ho raha hai aur wo lady kaise Pen bechne ki koshish kar rahi hai…. Us lady ki condition kharab thi… Fate-Purane kapde, Umra bhi jyda thi, Baat chit me energy nahin thi jisse lage ki usne kuchh theek se khaya piya bhi ho…. Bahut hi buri condition thi… Par itne bure condition me bhi jo Ek bahut achhi chij maine observe kiya usme wo tha uska Swabhimaan…. Wo chahti toh usi signal me hath me pen ke jagah ek Katora rakh leti…. Uski umra aur condition ko dekhte hue log use paise bhi de dete… Aur jitna wo abhi pen bech ke earn kar rahi thi Shayad usse jyda paise bhi use mil jaate… Par usne doosra rasta chuna….Wo tha kaam karne ka… Kyunki uske andar wo Swabhimaan tha….aur ye baat mujhe us lady ki bahot hi pasand aayi….. Mere pass change me us waqt 30 Rs the… aur jab wo mere pass aayi to maine usse 3 Pen le liye…… Isliye nahin ki mujhe un Pens ki us waqt zaroorat thi….. Balki isliye ki wo lady demotivate na ho aur uske mann me ye baat na aaye ki jo raasta usne chuna hai wo galat hai….. Mere side se use motivated rakhne ka aur wo Sahi raste me chal rahi hai is baat ka use ehsaas dilaye rakhne ke liye jo ek chhota sa effort mai kar sakta tha… Bas us koshish ke liye hi maine wo pens usse liya…

Shayad Ganpati Bappa ko bhi mera ye chhota sa effort achha laga ho isliye Sham ko jab mai Dagdu Ganpati Mandir gaya darshan karne ke liye… toh last 3 baar ki tarah mujhe is baar chhote se bhi line me nahin lagna pada… Sab kuchh itna smoothly aur jaldi jaldi hua….Mandir ke premises se bhagwaan ke samne mai shayad 2-3 minute me pahuch gaya…. Pandit ji ne bhi jo flowers aur Nariyal maine apne sath laaya tha wo achhe se liya aur return me mujhe prasad diya…Jo ki normally hamesha fast fast aur bhheed bhheed me hota tha.. Par is baar sab aaram se aur achhe se hua…… and maine Wish bhi jitni bolni thi sab maine bol di…. Pehli wish pehli baar maine apni Friend Pooja ke liye boli… Normally mai hamesha Pehli wish apne Parents ke liye hi bolta hoon…. Par is baar maine Pooja ko promise kiya tha….. Pooja ne mujhe specially bola tha ki mai uske job ke liye sabse pehle wish karoon…… and I promised her ki theek hai.. sabse pehle uske job ke liye hi bolunga……. Promises ki values bahut hain mere life me…. Normally meri life ka usool kehta hai ki agar maine koi promise kisi se kiya hai to mujhe wo nibhana hi hai…. Worst of the Worst case me kai baar aise bhi situations aaye hain jab maine kisi ko kuchh promise kiya ho aur wo main poora nahin kar paaya….But uske liye mujhe kaafi hurt hua hai baad me jaake… Isliye I believe in keeping my promises…

Pooja ek career centric girl hai…. Mujhe pata hai ki uske life me Job ki kitni importance hai….Jis tarah se wo apne career ko leke serious hai… Uske life me ek aim hai…Use life me self-driven hona hai……. Par itni baaton ke baad bhi jab uske parents ki tabiyat kharab ho gayi aur uske parents ko uski zaroorat thi toh usne apna job chhod diya and dedicately apne parents ko time de rahi hai…. Uski baaten bhale hi bachcho jaisi masoomiyat aur natkhati kyun na ho par uski decision making me uski maturity saaf nazar aati hai… Uski life me uske apno ki ek alag jagah hai aur uske career ki ek alag jagah…Aur wo dono ko leke hi bahut passionate hai….. Ye bahut kuchh milta hai mujhse……. Main bhi apne life me apne career ko leke aur apne Family ko leke bahut passionate hoon……… Isliye mujhe Pooja ke liye bahut respect aata hai… Main apni life ke jis kathin daur se guzar raha hoon… agar Pooja na hoti to shayad ye aur bhi kathin ho jaata… Par usne mujhe bahut support kiya hai ek mental trauma se nikalne mein…..Subah aankhen khulti hai to phone me uske messages hote hain…. Raat ko sone ke pehle uske messages hote hain….. Use apne job ki taiyaari karni hai, Uske apne parents ka khayal rakhna hai par roz 1-2 ghante shaam me mujhse baat karne ke liye wo waqt nikalti hai…. Aur wo uska typical dhamki shaam me… ki mai khaana khaake aati hoon.. Agar soya to soch lena…… :-)…Aur agar mai so gaya to uska wo thoda sa gussa dikhana….. Kuchh waqt ke liye message na karna… Ye sab achha lagta hai……. Par ye sab tab tak theek hai jab tak wo mujhse kuchh expect nahin kar rahi hai…. Mujhe uski ye sab baaten achhi lagti hai kyunki mera dhyaan thoda bat jaata hai uski ye sab baaton se aur chehre me thodi hansi aajati hai….Par mujhe darr hai ki kahin wo mujhse kuchh expect na karne lag jaaye….. Main ab kisi ki expectation poori nahin kar sakta…. Kyunki mere andar ab kuchh kisi ke liye karne ka zazba khatam ho gaya hai….

Jis chij ke liye basically is baar main Pune gaya tha…. wo to pata nahin kaise hua…. Interview hua bhi aur kaise hua mujhe khud pata nahin….. Mujhe ye bhi theek se yaad nahin ki andar maine Good Morning bola ya Good Afternoon…. Basically thoda mai nervous tha and 2 baje ka waqt tha jab mera number aaya…Socha bhi tha ki Good Afternoon wish karna hai panel members ko… Par pata nahin andar maine kya bola….. Pooja ne ekdum naani ki tarah meri class li thi ek din pehle….Jitni chinta to mujhe mere interview ki nahin thi utni toh use thi….. Bar Bar message karke puchh rahi thi ki kaise hua.. kya hua….and Interview khatam hone ke baad sabse pehle maine use hi call karke sab bataya…… and Uska wo kehna ki ‘Interview tera tha aur andar se mujhe stress ho raha tha…. Abhi mujhe achha lag raha hai’….It was a very nice feeling hearing such sweet words…. Interview ki sham maine return train board karne ke pehle firse Dagdu Sheth Ganpati Mandir jaake unhe pranaam kiya…….Is baar maine unhe thank you bola ki sab kuchh theek theek ho gaya.. aur Result unpe chhod diya ki aap chahe fail karo ya pass….I will accept it as your blessing…. Fail bhi hua to usme bhi kuchh achha hi hoga… pass bhi hua to usme bhi kuchh achha hi hoga…..Return ke time jab mai Mandir ja raha tha to jis auto me mai baitha un auto wale uncle se bhi meri bahut achhi baat ho gayi….. ‘Unhone kaha ki aapki age ke ladke to aajkal mandir jaate hi nahin…. Aap mandir ke liye bole isliye main turant haan bol diya nahin to mai doosre side ja raha tha’….. Unse mandir pahuchne tak kaafi baat hui…. aur unhone apna kaafi experience share kiya Pune city ka… Basically 20 minute tak ki humari journey thi…. E-Square carnival se leke Dagdu Ganpati sheth mandir tak ki…… Achha experience raha…

Mandir darshan ke baad maine Pune se do Paithni bhi liya (Maharashtrian Sarees)…. Ek Mummy ke liye and ek meri Maami ke liye…… Mujhe to dono hi achhe lage….. Mummy ko pata nahin jyda kaunsa pasand aayega… Photo to maine dono hi Sarees ke bhej diye mummy ko….. Mummy ke liye orange color maine select kiya and meri maami ke liye maine Pink color select kiya…… Pooja ko to Pink saree jyda pasand aayi….. Wo keh rahi thi ki Pink mai Mummy ko de doon aur Orange Maami ko de doon…. but maine Pink apni Maami ke liye liya tha toh unhe hi dena chahta hoon…..Overall kaafi achha tour raha.. Maine ek bahot pyaara sa mall bhi visit kiya Pune me…’Tha Pavillion Pune’… Wahin pe I watched ‘Thakrey’ movie……. Nice experience and very nice movie….Sab kuchh theek theek se hua and finally I am back home jahan se nikla tha….Aur ab jab maine saari yaadon ko yahan likh diya hai….toh ye words hamesha mujheis experience ko alive rakhenge…..

Leave a Reply

Your email address will not be published. Required fields are marked *