Babumoshai Bandookbaaz: Love, Lies, Betrayal

Chhutti ka pehla din kaise nikal gaya pata hi nahin laga… Aksar meri life me aisa hota hai ki mai dher saara planning karta hoon chhuttiyo ke liye par chhuttiyo me hardly mai un plannings ko apply kar paata hoon… Aadhe se jyda samay to sone me chala jaata hai… Jab chhuttiyo me khas kuchh karne ko na ho to mere bed se uthte-uthte suraj sir pe aajata hai aur din aadha khatam ho chuka hota hai…. Aaj bhi kuchh waisa hi hua….Jo ek chij maine aaj useful kiya poore din me wo tha apna MBA ka admission form maine fill karke post kiya… Iske alawa routine work aur Friend se baat chit me hi din nikal gaya…

Pichhla hafta achha gaya….Mujhe apne Bank ke Executive Director (ED) se Certificate, Trophy aur Cash reward mila. Jo Hard work maine January ke mahine me kiya tha Bank ke ek Campaign me participate karke din se raat, Uska recognition mila, appreciation mila… Soch ke achha lagta hai aur satisfaction milta hai ki koi kaam aapne dil se kiya ho aur us chij ki value ho, logon ko aapke effort ka pata lage…. Bank ke almost sabhi jo mujhe jante the….ya jo mujhe nahin bhi jante the…Regional Office se, Zonal Office se…. Unhone mujhe phone kiya, congratulate kiya…aur 2.5 saalon ke ab tak ke apne is job me pehli baar mujhe aisa laga ki I made my mark upto some extent….Maine All India level ke is Campaign me top kiya aur ye mera pehla major success tha ab tak ke mere professional life me..

Bahut se log kehte hain ki Personal Life aur Professional Life ko alag alag rakhna chahiye…. Ye baat jitna kehna aasaan hai, utna hi mushkil hai is baat pe amal karna….Dono hi life ek doosre se interlinked hoti hai….Agar aapka Professional Life kharab chal raha ho to aapko Personal Life me bhi khushi nahin milegi….Similarly agar aapka Professional life me koi success ya failure hota hai to uska asar aapke personal life me bhi padta hai… Meri is success se jo mujhe andar se confidence mila hai.. Us confidence ki mujhe bahut zaroorat thi…Zindagi firse pichhe jaake re-start karna aasaan nahin hota…Andar bahut kuchh toot chuka hota hai… Jo thoda sa confidence maine gain kiya hai apne professional life se, usse definitely mujhe help mil raha hai Personal Life aage badhaane me..

Kal sham dhalte-dhalte mujhe youtube me ek movie dikh gayi….Babumoshai Bandookbaaz… Chhutti ka din ho aur koi movie dikh jaaye net pe jispe achhe reviews padhne ko mil jaayen toh wo movie chhodna fir mushkil ho jaata hai…Atleast mere sath to aisa hi hai…. Maine movie download kiya aur poori movie dekha… Movie ko agar simple 2 lines me describe karna ho kisi ek angle me toh wo kuchh aisa hoga ki: Ek ladke (Nawazuddin Siddiqui) ne ek ladki se pyaar kiya…Use ghar diya, apne saare raaz bataye, aur bepanaah mohobbat kiya……Par us ladki ne Nawaz ke pichhe ek doosre ladke se affair shuru kar diya…Aur fir us doosre ladke ke sath milke Nawaz ko maarne ka plan bana liya……….. Twist to tab aaya jab Nawaz bach ke laut aaya aur us ladki ka raaz khul gaya…Raaz khulne ke baad Nawaz ne us ladki aur us ladke dono ko maar diya..

Movie jab khatam hua toh mere mann me itne sawaal uth rahe the aur un sawaalon se jyda pareshaan mujhe ye baat kar raha tha ki aise kitne dhoke dunia me roz kisi na kisi ke sath hote honge jinke raaz kabhi khul hi nahin paate honge…. Koi kisi ke pichhe uske baare me kya baat kar raha hai… Kisi ke mann me kisi ke liye kitna zeher bhara hua hai… Kisi ke mann me kisi ke alawa aur bhi koi hai ya aur kaun kaun hain… Jab do logon ka rishta banta hai to us rishte ki baat un do logo tak hi rehti hai ya kisi teesre tak us rishte ki baaten pahuchti rehti hai……… Aise anginat raaz hote honge dunia me jo kabhi saamne aa hi nahin paate honge….Kyunki unka koi saboot hi nahin mil paata hoga….. Kitne andhere me jeete honge wo log jinke pichhe aur jinke khilaaf ye sab hote rehta hai … Aur karne wala koi apna hi hota hai…Khaskar wo jisse unhe sabse jyda pyaar ho…

Par is dunia me aise bhi bahut saare lucky log hote hain jinke saamne se aise dabe-chhupe raaz khul jaata hai aur jhuth benakaab ho jaata hai………Is movie se mujhe ek chij to realize hua ki jo log achhe hote hain unke sath bhagwaan bhi hota hai…. Chahe wo bhagwaan ko maane ya na maane…Bhagwaan ki pooja karen ya na karen…..Bhagwaan ke liye Fast rakhen ya na rakhen….Mandir jaayen ya na jaayen…. Par jinka mann saaf rehta hai… Unke sath Bhagwaan hota hai….. Bhagwaan khud hi kisi na kisi tareeke se unhe saboot de deta hai aur saare raaz khul jaate hain…. Basically ye Bhagwaan ka ashirwaad rehta hai ek naya re-start karwane ke liye…..aur jo galat unke pichhe chal raha hota hai usko be-parda karne ke liye…

Ek aisi hi aur movie dekhi thi maine…Rustom…. Pati desh ki seva me laga hua tha.. Din-Raat apna kaam kar raha tha…..Patni ke life me koi aur hi aa chuka tha….Pati jab ghar lauta aur use is baat ke saboot mile toh use kaisa laga hoga…….kya guzri hogi uspe….Imagine karna mushkil hai jo pain usne mehsoos kiya hoga….Aur kaise sambhala hoga khudko us condition mein… Logon ke samne kaise behave kiya hoga….Par tab, jab maine Rustom movie dekhi thi, tab maine itni gehraayi se is baare me nahin socha tha jitni gehraayi se maine aaj is baare me socha……

Kuchh logon ki poori zindagi kisi ek ke pyaar me kum pad jaati hai… Aur kuchh aise bhi hote hain jinke liye pyaar me koi ek kum pad jaata hai, unhe ek se jyda insaan ki zaroorat pad jaati hai pyaar paane ke liye……Shayad aise logon ke liye pyaar ka matlab sirf saath paana hota hai..Chahe sath koi bhi ho…. Aaj jab main ye saari baaten likh raha hoon toh Valentines Week chal raha hai…. Kal Promise Day aane wala hai….11th-February-2019…. Poori dunia me kal ke din anginat promises honge…. Ye to pata nahin ki usme se kitne promises real honge aur Kitne promises ke pichhe koi raaz rahega…..Par sochta hoon ki Kaash har promise aur Insaan is dunia me real hota … Toh kisi ka dil toot-ta hi nahin…. Koi saboot bante hi nahin kabhi… Koi raaz khulta hi nahin kabhi….

Movies ko dhyaan se dekho aur uske baare me socho toh kitna kuchh sochne pe majboor kar deta hai movie… Har movie kuchh kehta hai…. Kabhi hum sirf entertainment aur time-pass ke hisaab se us movie ko dekh ke khatam kar dete hain… Par jo writer us movie ki story likhta hoga…. Uske dimaag me kitni saari baaten chalti hogi…Usne kitni gehraayi se un baaton ko socha hoga, mehsoos kiya hoga… Aur fir un baaton ko words me utaara hoga…..Un baaton ko aur un sentiments ko unse better kaun samjh sakta hai jinke sath life mein wo stories actual me ho chuki hain…..

Leave a Reply

Your email address will not be published. Required fields are marked *