Monsoon 2019… Yet another season of Happiness

Garmiyon ke khatam hone ke saath saath shuruwaat ho gayi Monsoon 2019 ki….Ek naya season aur ek naya Monsoon……Monsoon, jiska intezaar mujhe saal bhar rehta hai…Is mausam ke aane se sabkuchh itna achha lagne lag jaata hai….. Bahar sab kuchh hara bhara sa lagta hai…. Aasmaan me baadalon ke beech jab thandi hawayen chehre ko chhu ke nikalti hai aur baarish ki rimjhim rimjhim bund chehre pe padti hai… Agar sochun to us khushi se jyda bada kuchh bhi nahin lagta….Upar aasmaan ki ore agar nazar daalo toh chidiyo ka jhhund bhi khushi se aasmaan me aise ghumte nazar aata hai jaise unhe bhi saal bhar se is Monsoon ka intezaar raha ho….

Main ghanto is mausam me raste mein reh sakta hoon…. is jagah se us jagah… Bina ruke, Bina thake aur bina ek pal bhi kuchh soche… Sirf is mausam ki khoobsurti ko mehsoos karte hue….Aur yahi is waqt mai karke aa raha hoon… Jitna fresh mai mehsoos kar raha hoon….Shayad yahi wajah hai ki apni is khushi ko main shabdon me utaar dena chahta hoon….Is waqt India-England world cup match chal raha hai….Agar koi bhi doosra waqt rehta … to mai is waqt sirf aur sirf match dekh raha hota…….Aur uske alawa aur kuchh bhi nahin kar raha hota…..Par ye monsoon ka hi asar hai ki mai is waqt match ko side karke is mausam ki khoobsurti ke baare me soch raha hoon aur ise likh raha hoon…

Jitna achha baarish ko mehsoos karna lagta hai… Utna hi achha lagta hai ghar ke andar se us baarish ki awaaz ko sunna.. Kal raat yunhi raat me 3 baje ke kareeb meri nind khul gayi… aur maine khidki se baahar baarish hote dekha……Mai kareeb 20 minute tak khidki ke samne hi khada raha… Ek tuk dekhta raha us baarish ko…. Bijli ke khambe pe lagi hui light ki roshni ke saamne wo baarish ki leher kitni saaf nazar aati hai….. Thoda Safed, Thoda laal.. Adbhut hota hai wo dekhna…Raat me kaale aasmaan ke niche ye sab hote dekhna bhi ek alag hi experience hai….. Jise is mausam se pyaar hai shayad use is mausam ki har chhoti si chhoti baaten achhi lagti hai…

Mujhe baarish ke mausam ka sabkuchh bahut achhe se yaad hai… Bachpan me baarish me bheegte-bheegte ghar aana…..School se aake Mummy ka mujhe towel dena aur mere baalon ko sukhana ki kahin sardi na lag jaaye mujhe….School bag geela hojana, wo mujhe chalta tha.. par jab tak baarish itni tez na ho ki wo mere Books-Notebooks ko geela kar de, mai bheegna nahin chhodta tha…. Ghar ke saamne bhare hue paani me tez raftaar se cycle chalana……har ek chhoti si chhoti baat……. Garmi ki chhuttiyo ke khatam hone ke baad wo baarish ka hi mausam tha jo mujhe chhutti ke khatam hone ke afsos bhulane me madad karta tha…

Jo do yaaden baarish se related mere zehen me sabse kareeb hai… Jin do yaadon ko mai aksar yaad karta hoon akele mein… Unme se ek wo hai jab College me admission lene se pehle meri tabiyat kharab ho gayi thi…. itni kharab ki mujhe hospital me admit bhi hona pada tha…. Hospital se discharge hone ke baad ek roz jab subah mai jaldi uth gaya… Subah ke 6 baje the…aur main TV ka remote hath me leke randomnly channel change karne lag gaya….Jab kisi channel me kuchh bhi nahi achha laga to maine just 01 channel laga diya jo tha DD One..Doordarshan…… Doordarshan me subah us waqt Krishi Jagran programme chal raha tha… Pata nahin ab aata hai ya nahin aata……. Bahar bahut tez baarish ho rahi thi aur us programme me hare bhare khet aur kheti mein upyog hone waale beej, alag alag mitti aur alag alag crops ke baare me dikhaya ja raha tha……Kisi ke liye bhi ye bahut mamuli si baat hai…Isme yaad rakhne jaisa kuchh bhi nahin hai… Par pata nahin ye incident mujhe aksar yaad aata hai.. har saal yaad aata hai…. aur khaskar tab jab bahar baarish ka mausam hota hai…Aur jab bhi mujhe ye yaad aata hai mai bahut khush ho jaata hoon andar se…..

Doosri baat jo mujhe baarish se related yaad hai.. wo ye ki class 12th ke result aane ke baad maine koi part time job search shuru kar diya tha….Tab maine ek article writing job ke baare me net me padha.. aur maine article likhna shuru kar diya computer mein…Kyunki mujhe likhna hamesha se pasand raha hai maine us line me hi job search karna shuru kiya tha….. Baarish ka hi mausam tha aur us article se related jo story maine likhna shuru kiya usme baarish ka zikra karte hue jo meri story thi…Us poori story me door pahaadon ke beech ek jungle ka location tha aur baarish ka mausam tha….Maine us story ko likhne ke pehle khudko us situation me poori tarah imagine kiya… aur main itna kho gaya tha wo article likhte likhte…..5 raat lage the mujhe us article ko khatam karne me aur un 5 raaton ne mujhe baarish ke aur kareeb la diya aur har raat mai khudko baarish ke mausam me kisi hill station me kisi ghane jungle ke beech mehsoos karta tha…Article khatam hone ke baad mujhe aisa laga ki maine 5 nights ka kisi hill station ka tour khatam kar liya ho…..

Yahi wo wajah hai jiske karan mujhe Hill Stations se ek alag hi lagao hai wo bhi Baarish ke mausam mein…….. Pichhle 3 saalon se main Monsoon ki is khoobsurti ko aur bhi kareeb se mehsoos kar raha hoon…2016 ke monsoon ki wo yaaden…. jo maine Pune aur Mahabaleshwar me mehsoos kiya….2017 ki wo monsoon ki yaadein jo maine Pachmarhi me mehsoos kiya….. aur 2018 ki monsoon ki wo yaaden jo maine Ooty mein mehsoos kiya….Ye saari yaadein kuchch aisi yaadein hain jinhe main marte dum tak nahin bhool sakta……In yaadon ki do alag alag khoobsurat baaten hain….Ek ki meri ye saari yaadein Monsoon ke mausam se judi hui mere collections ko aur bhi khoobsurat bana deti hain…. Doosri ki maine ye saari yaadein kisi aise insaan ke sath jiye hain jise mai sabse jyda pyaar karta hoon…..

2019 me pata nahin, meri yaadon ki kitaab me koi naya chapter jud paayega ya nahin…… Mann to mera itna hai ki mai sab kuchh chhod ke door kahin fir se chale jaana chahta hoon har saal ki tarah… Train ke us safar mein jahan train ki khidki se mujhe tip tip barsaat hote dekhne ko mile….Par jiske sath jaana chahta hoon uska saath bhi hona zaroori hai……… Monsoon ki khoobsurti to har taraf hai, har jagah hai…. Par door kahin is khoobsurti ko jake behadd kareeb se mehsoos karne ka jo maza hai…Kash wo har saal ki tarh agar is saal bhi mai mehsoos kar paata apne someone special ke sath…….Nahin toh aisa lagega ki is Monsoon kuchh miss ho gaya…..

Leave a Reply

Your email address will not be published. Required fields are marked *