A Day of Shivaji Jayanti

Aaj 19th-February-2019 ko Shivaji Jayanti ke roop me manaya gaya…Yahan Maharashtra me Shivaji Jayanti ka ek alag hi utsaah hota hai….Logon ka utsaah dekhte hi banta hai…. Is utsaah ko dekhna aur ise feel karna achha lagta hai, khas kar tab jab aap yahan ke na hon……… Mujhe Maharashtra me aaye hue 3 saal se upar ho gaye…. 16th-November-2015 ko meri job ki joining thi aur main yahan aaya tha 15th-November-2015…Poore ek din train me travel karke…
Waise to mai uske pehle Maharashtra kai baar aa chuka tha… Par rehne ke liye nahin… Kabhi Exam dene ke liye, Kabhi Ghoomne ke liye… Kabhi Medical ke liye….. Jab koi kahin rehne ke liye jaata hai, toh uski soch aur uski wahan ke baare me samajh thodi badh jaati hai…..Mere sath bhi kuchh aise hi hua…

Subah subah 5 baje mai Latur pahucha tha… Thand ka mausam tha, Andhera tha aur Station ke bahaar Passengers se jyda Auto walon ki bheed thi…. Kahan jaana hai station se bahar nikal ke ye na mujhe maloom tha na mere sath jo mera Ek dost tha, jo ki meri tarah hi usi train me aaya tha Jhharkhand se.. Aur hum donon ek auto pakad ke chal pade Bus Stand ki ore…..Use Chakur Jaana tha aur Mujhe Renapur….. Pehle to humara directly bus pakadne ka iraada tha…. Par meri halath nahin thi….. Kyunki mujhe raat me neend nahin aaya tha, na hi use…….. Actually mera to train ticket confirmed tha….. Par hum total 3 the…. Jo ki Nagpur ke station me mile the ittifak se… Hum teeno ka hi same route tha aur maksad bhi…..Hum teeno me se sirf mera train ticket confirmed tha…So maine un dono ko hi apne berth me aajane ko kaha …. Din ka time to baat chit me nikal gaya… Par raat me teeno ka hi sona nahin ho paaya… Baithe Baithe ankh lagti thi thodi si fir khul jaati thi….Thandi ka mausam tha so alag…. So hum thakk gaye the bahut jyda….Isliye humne directly bus pakadne ka plan drop kar diya aur humne ek hotel book kar liya…Latur Bus stand ke just samne….Humne check-in kiya aur Bag rakh ke sidhe so gaye…. aur Uthe hum dopahar ke 2 baje….

Hum jahan ruke the, uske just pichhe kuchh hi doori me humare Bank ka Regional Office tha and uske Upar Staff Quarter bhi tha…. Ye baat hume subah maloom nahin thi…Warna hum sidha wahin jaate…. Ye baat hume sham ko maloom chala jab humne phone contacts lagaane shuru kiye alag alag logon ko aur ek seniors se humari mulakaat hui…..Sham ko hum Staff Quarter gaye.. wahan humare Union Head se mulakaat hui… apne apne branches ke location, wahan kaise pahuchna hai, wahan ka mahaul kaisa hai… ye saari baaten hui… Kuchh Rules and Regulations ke baare me maloom chala…..Wahan Staff quarter me humari mulakaat humare do aur colleagues se hui….. Uttam aur Sachin…. Dono mumbai se aaye the……Fir hum charon shaam me Latur ghumne nikle….. Latur PVR tak gaye.. wahan pe bahar premises me kuchh der baithe aur wapas aake humne Staff Quarter me hi dinner kiya…

Agli subah humne check out kiya… Breakfast sath karne ke baad mere colleague ne Chakur ke liye bus pakad liya aur mujhe receive karne ke liye aa gaye mere branch se mere ek senior …Durrugkar sir…..Unhone ne bahut hi warmly mujhe receive kiya…aur Latur ke alag alag raston ke baare me batate hue mujhe le gaye mere Branch Manager ke ghar… Jahan Branch Manager se mulakaat ke baad hum teeno chal pade apne Branch ki ore…. Wahi Branch us din se mera ghar bhi ban gaya kyunki Branch ke upar rooms khali the aur un rooms ko zaroorat thi to sirf Saaf-Safai ki .. jo ki sham hote hote tak poora ho gaya…Thanks to Ram Bhaiya and Anand Bhaiya…Jinhone subah se sham tak milke mere liye ek Aashiyana bana diya….

Us ghar me rehte hue hi maine Maharashtra ke logon ko jaana, yahan ke Khan-Paan, Riti-Riwaz, yahan ki bhasha, yahan ka Rehen-Sehen…. Sab dekha aur samajhne ki koshish kiya…….Aur isi dauraan maine dekha Shivaji Jayanti ka utsaah….Logon ka rally nikalna, Logon ka bike me baithke Flags lagaana….Shivaji Chowk ko dhoom-dhaam se sajaana…. Sab dekh ke bahut achha laga….Main khud ko khushnaseeb samajhta hoon ki main Maharashtra ka na hote hue bhi Maharashta ke dono chhor ko kareeb se mehsoos kiya hoon…. Main Marathwada me bhi raha hoon aur ab mai Vidarbha me rehta hoon…..Vidarbha ke comparison me Marathwada me Shivaji Jayanti ka utsaah jyda dekhne ko milta hai….. Main Latur gaya, Nanded gaya, Parbhani gaya, Aurangabad gaya, Sangli gaya, Kolhapur gaya, Pune gaya….. Har jagah maine Shivaji Chowk dekha aur Shivaji ke naam se Shops, Banners, etc… Ek alag hi craze hai Shivaji ka Marathwada mein……. Aaj ka din mujhe usi craze aur utsaah ki yaad dila raha hai…Latur ke apne antim antim padaav me, main Mahabaleshwar Gaya….Wahan Pratapgarh Fort me Shivaji ka Ek bahut bada statue hai…Round….. Us fort ki yaaden aur wo Shivaji ka statue bhi aaj yaad aa rahe hain……

Mere Latur ke Aashiyaane me do mere chhote chhote dost bhi bane….. Do Pyaare se chhote se chidiya….jo mere sath mere us ghar me rehte the……Wo dono kabhi ladte the, kabhi ek doosre se rooth jaate the to alag-alag baith jaate the… kabhi pyaar me rehte the to sath me rehte the….. aur ye sab chijen mai observe karte rehta tha bahut hi baariki se…….. Kyunki mere pass sirf wo do the jo sham ko kaam se lautne ke baad mere sath hote the…… Wo meri chhoti si dunia ka hissa ban chuke the Latur mein… Garmi ke ek roz maine unme se ek ko kho diya……. Shayad meri hi galti se….. Mere chhat me chalte hue fan se takra ke ek ne dunia ko chhod diya aur doosre ke akelapan ki wajah main ban chuka tha…..17th-August-2016 ko maine apna wo Latur ka Ashiyaana hamesha ke liye chhod diya…….Pata nahin Zindagi me dobara kabhi aisa samay aayega ya nahin ki main wahan kabhi wapas jaake wahan bitaaye apne yaadon ko ek baar aankhon ko band karke fir se yaad kar sakoon….Aur akele me thoda ro sakoon…….Bahut se sapne bane…Bahut se dost bane….Bahut se logon ke sath mulakaat hua… Aur mere us Ashiyaane ke sath bahot kuchh pichhe bhi chhut gaya….. Par shayad mere us chhote se dost …jo shayad meri wajah se akela ho gaya tha…..Uska curse mere sath hi reh gaya……..

Leave a Reply

Your email address will not be published. Required fields are marked *